كيف أتعلم ؟

أحيانا يجي ببالنا ودنا نتعلم مهارة معينة أو نتثقف بمجال معين بس نتفاجئ إن هالشي اللي ودنا نتعلمه شي كبير وواسع ، وأحيانا تتحمس وتبدأ تتعلم أساسياته وتمل وتوقف ! أكيد فيه خلل بالموضوع أجل .. كرهته ؟ لا للحين متحمس تتعلم بس تحس إنك مخربط ! ..  بلخص خطوات لو اتبعتها بتساعدك في تعلمك لمهارة أو مجال معين. أول شي خل هدفك يحقق الخمس شروط اللي هي “محدد – قابل للتحقيق – محدد بزمن معين – واقعي – قابل للقياس” ، يعني مثلا ، أبي أتعلم الرسم ببرنامج الاليستريتور خلال إجازة الصيف.

١/ خصص أسبوع كامل للبحث عن أي شي متعلق بالمجال ، كتب ، مواقع ، أشخاص ، يوتيوب ، رسومات وغيره ، حاول تشبع نفسك بالمجال وتحدد بالضبط أنا لأي خطوة أي أتعلم .. مبتدئ بس ؟ وإلا حاب أدخل مجال الإحتراف ؟  .. إسأل من تعلموا هالمجال ، كم أخذ منهم من وقت ؟ هل أحتاج أدوات معينة أشتريها تساعدني ؟ .. وكل شي تلقاه اكتبه عندك أو خله في قائمة المفضلة عندك .. أو خصص لك مجلد على سطح المكتب فيه تجمع كل أمور هدفك ، بعد ماتخلص من هالخطوة تقدر تحدد لنفسك المدة الزمنية المناسبة لهدفك – المواضيع اللي بتعلمها – المراجع – الأدوات . والأهم بتجاوب على تساؤل هل أنا فعلا متحمس أو مجرد فكرة طرت ببالي .. جواب هالسؤال بيكون شغفك بالبحث وتجميع المصادر والمعلومات.

٢/ ارسم الخريطة الذهنية لهدفك ، بتفرعات الخريطة  اكتب مصادر تعلمك ، الأدوات ، الأوقات اللي بتخصصها للتعلم ، الأشخاص اللي ممكن تستفيد منهم بخبرتهم بهالمجال ، البرامج اللي بتحتاجها .. الخ ، ولا تنسى تحط لنفسك المكافأة بعد ماتنتهي من هدفك . بعد ماتخلص هذي هي خريطة الكنز ! علقها قدامك.

٣/ الوقت والمكان : اختر أوقات تكون فعلا رايق للتعلم ، لاتجبر نفسك تتعلم وإنت معصب أو متضايق ! .. رح روق لمدة نص ساعة وامشي لو بالسطح مع كوب قهوة بعدها ارجع ، بالمقابل اختر مكان مريح لك وخله مخصص لهالشي ، مثلا تستخدم زاوية معينة في غرفتك خاصة لهالهدف ماتروح لها إلا لما تبي تتعلم ، زين المكان وحط الألوان الرايقة ولاتنسى الإضاءة المريحة لك ، ولاتنسى بعد العبارات التحفيزية لنفسك.

٤/ ببدايات تعلمك ناقش ووري أعمالك للي مايعرفون للتصميم أبد بتتحمس من عباراتهم إنه شغلك بطل ! ولما تحس نفسك وصلت لمرحلة المتوسط اتجه للأشخاص اللي يمارسون هالفن علشان تبدأ تهتم لنقدهم في أعمالك ، المهم تختار أشخاص فعلا مايجاملونك وعارفين بجديتك بالتعلم.

٥/ إلتزم بجديتك في هدفك ، عاقب نفسك لو ماإلتزمت وماتعلمت شي هالاسبوع مثلا .. مافيه فلم ! أو عاقب نفسك تذاكر مادة من موادك “أحب هالعقاب واستخدمه كثير لانه عقاب بس لو فكرت كويس بلقى فيه فايدة ” ، بالمقابل كافئ نفسك لو تعلمت هالاسبوع الساعات المخصصة للتعلم + ساعتين زيادة .. كافئ نفسك بفلم أو عشا من مطعم تحبه ، وقيم نفسك فعلا .. اكتب الأيام وكل يوم وش تعلمت فيه ، بعدين قيم هالاسبوع كم تقييمه ؟ مثلا أخذت ٤/١٠ والإسبوع اللي قبله ٩/١٠ ! .. ليه ؟ وش الأشياء اللي خربت علي ؟ .. تذكر دائما إنك ماراح توقف إلا لما توصل لقمة هدفك.

٦/ أحيانا لما تنشغل بتعلم شي معين وفجأة يجي قدامك تعلم شي ثاني ودك تتعلمه بعد ! .. انتبه لا تخربط نفسك لا تبدأ بهدف تعلم شي إلا لما تخلص من اللي عندك ، لأنك بالغالب من الحماس بتوقف الأول وتجلس تستمر بالثاني :/ ، اكتبه عندك وخله هدفك الجاي بعد هالهدف اللي تمشي له.

بالنهاية .. في السنة الكاملة ، عالأقل تعلم شي واحد جديد بحياتك ! .. تخيل اللحين مثلا عمري ١٩ وبعد ١٠ سنين لما أصير ٢٩ أصير تعلمت “تصوير ، رسم ، طبخ ، تصميم ، ديكور داخلي ، فن معماري ، برمجه لغتين ، برمجه تطبيقات آيفون ، اهتمام بنباتات ” مره شي يحمس وهذا بس تعلمت شي واحد بسنة وحدة كيف لو تعلمت ٢ أو ٣ ! والأهم إنك بتربط هالأمور بحياتك ومجال عملك ، بتفيدك بعدين لما تقدم على وظيفة معينة.